Articles Comments

ИГЕО-ПОРТАЛ » На тема » Дали Македонија е во вистинската часовна зона?

Дали Македонија е во вистинската часовна зона?

10.10.2012

Уште од времето на поранешната југословенска држава, Република Македонија официјално го користи средноевропското време или гриничкото време зголемено за еден час (GMT+1). Но речиси секоја година, наесен кога стрелките на часовникот се поместуваат за максимално да се искористи дневната светлина, одново се поставува прашањето дали би било подобро да го користиме источноевропското време, кое е за еден час понапред од средноевропското. Тоа се оправдува со економски причини, бидејќи се смета дека ако се помести времето за еден час понапред Македонија ќе ја зголеми искористеноста на дневната светлина и ќе ја оптимизира заштедата на енергијата, а дополнително ќе ги подобри транспортните врски со земјите од регионот – Бугарија, Турција и Грција.
Сепак, ваквите тврдења немаат соодветна поткрепа. Концептот на часовни зони или зонско време е прифатен на меѓународна конференција уште во 1884 година. Според овој концепт, целата Земјина топка е поделена на 24 часовни зони од по 15 должински степени. Територијата на Европа пак главно припаѓа на 3 часовни зони: западноевропска или нулта зона (GMT+0), средноевропска – прва зона (GMT+1) и источноевропска – втора зона (GMT+2). Секоја зона има средишен и гранични меридијани. Средниот меридијан во западноевропската зона е Гриничкиот меридијан, што значи таа го опфаќа просторот од 7,5 степени на запад и 7,5 степени на исток од Гринич. На 7,5 степени (7 степени и 30 минути) источна географска должина почнува средноевропската часовна зона, а завршува со граничниот меридијан на 22,5 степени источна географска должина. Граничниот меридијан меѓу средноевропското и источноевропското време, минува низ источниот дел на Македонија и тоа од подрачјето на Тораница на север, покрај Виница, Радовиш до Гевгелија на југ. На исток од овој меридијан до најисточната точка во државата (кај врвот Ченгино Кале на Малешевските Планини) се наоѓаат 3550 км кв или 13,8% од вкупната територија. Во вакви случаи кога една релативно мала држава припаѓа на две временски зони, се прифаќа таа што зафаќа поголема површина од државата, освен во специјални геополитички, економски, воени и други случаи. Имајќи во предвид дека 86,2% од површината на Македонија лежи во средноевропската часовна зона, сосема е логично и исправно официјално да се користи средноевропското време.
Често, како образложение за евентуално прифаќање на источноевропското време се наведува „прераното“ стемнување во зимскиот период околу 16 часот. Меѓутоа, доколку се прифати источноевропското време, во зимскиот период ќе се разденува дури во 7.30-8.00 часот. Во летниот период пак, ќе се стемнува невообичаено доцна, околу 21-22 часот, а ќе се разденува во 6 часот! Доцното разденување и стемнување ќе бидат особено изразени во најзападниот дел на државата. Втората нелогичност произлегува од оддалеченоста на крајните источни и западни точки во нашата држава до соодветните средни меридијани на часовните зони според кои се одредува времето. Така, најзападната точка во Македонија која е на 20,4 степени и.г.д. е само 5,4 степени (околу 20 минути време) источно од 15-тиот степен или централниот меридијан на средноевропската часовна зона, а речиси 10 степени (дури 40 минути) западно од 30-тиот степен, кој пак е централен меридијан на источноевропското време. Најисточната точка во Македонија е на 23,1 степени и.г.д. или 8,1 степени (33 временски минути) источно од меридијанот на средноевропската зона, а 6,9 степени (27 временски минути) западно од меридијанот на источноевропската зона или разлика од само 1,2 степени (5 временски минути). Тоа значи дека астрономско-географски, Македонија е многу поблиску до средноевропското време. Уште повеќе ако се има во предвид дека речиси сите земји од централна и западна Европа (со исклучок на Британија, Ирска, Португалија и Исланд) со кои Македонија има голема економска соработка, го користат ова време. На Балканот, само Грција, Бугарија, Турција и Романија кои се значително поисточно, официјално го користат источноевропското време. Грција пак, која заедно со островите лежи значително поисточно од Македонија, самата има одредени проблеми и нелогичности со користењето на источноевропското време во крајниот западен дел на државата.
Според тоа, најсоодветно е Македонија да го користи средноевропското време. Доколку има потреба, пологично е да се помести работното време за еден час порано, бидејќи географската широчина и климатските услови кај нас го дозволуваат тоа, за разлика од државите кои се посеверно.

Автор: д-р Ивица Милевски

Оваа статија е прочитана 6988 пати!

Објавено од:

Од категорија: На тема

6 одговори на "Дали Македонија е во вистинската часовна зона?"

  1. Kekos says:

    Vo holandija se stemnuva 22:30 letoska, Germanija okolu 22 Francija okolu 22:30 Spanija okolu 22 , Italija okolu 21:30 ,Svajcarija okolu 21:30 , neznam sto e nevoobicaeno tuka? Izgleda nevoobicaeno e sto vo MK se stemnuva vo 20:30…

  2. Erikson says:

    Mala korekcija ali nema veza
    Na letna dolgodenica po glavni gradovi u u eu se stemnuva
    u rim u 21:23
    u praga u 22:00
    u bern u 22:05
    u berlin u 22:23
    u madrid u 22:23
    u paris u 22:40
    u amsterdam u 22:55
    Kako sto moze da se zaprimeti e toa sho nigde u zapadna eu u spic na leto nigde ne paga mrak pred 21:00, a samo u makedonijava mrak uste vo 20:45, ali zato den nautro ushe vo 4:23

  3. Erikson says:

    Jasno e deka vo makedonijava e nevoobicaeno, a ne na zapad
    Realno bi trebalo da bde
    U zimo 7:30-17:33
    U prolet 6:30-19:00
    U leto 5:23-21:45
    I u esen 6:50-19:50

  4. apnasonic says:

    Dali nekogas ke se smeni casovnava zona vo MK ? Ili barem dali nekogas ke se ponisti zimskovo smetanje ? Stvarno e smesno , vo mart mesec se razdenuva vo 5:30 , a mrak paga vo 18:50, ne bi bilo poarno denot u mart da bide od 6:30 do 18:50 ?
    I zosto mora vo noemvri dekemvri i januari da se razdenuva uste vo 6:30 za veke vo 17:00 da bide crna temnica ? Lesno bi mozelo da se pomesti toa i vo zimo da se razdenuva vo 7:30 , а denot na pladne bi trael do 17:30 , kraj na januar i do 18:00 … Site dobro go znaete toa , ama poradi politicki pricini , zemjava e zatucana vo GMT +1 zona…

  5. lovue says:

    Dajte barem veke smenete ja casovnava zona, mislam novi generacii idat, ne bi bilo poarno letoska da bide den do 21:30 ? Ili zimoska bar da bide den do 17:30 ? Mislam svarno e smesno veke recisi 30 god od raspadot na SFRJ seuste ziveeme vo gresna casovna zona….

  6. Ruhrgebiet says:

    Nekoj ke rece, stani nautro porano i ke imas podolg den … Vo teorija e taka, no vo praksa ne e taka. Ne e poentava, ako vo prolet se razdenuva uste vo 6:00 i ajde site bas u 6:00 da stanuvaat od spienje… Pretpostavuvam ja svakate poentata. Bidejki denes e se bazirano na saat, ne ziveeme vo kameno doba, ne ziveemo od izgrejsonce do zajdisonce, takada jasno e deka prerano pocnuvaat denovite, prerano se razdenuva gledano na saat i zatoa veke redno vreme e da se smeni casovnava zona… Koja e logikata vo leto denot da zapocnuva uste vo 4:30? Na komu mu e potrebno tolku rano dnevna svetlina ?

Leave a Reply

*

Advertisment ad adsense adlogger